نقد فيلم: مبارة الانتقام

فيلم بحكي قصة ملاكمين بينهم ثأر، ممكن نحكي عنه زي هيك او ممكن نحكي انه الفيلم عبارة عن فيلم مبني على فلمين Raging bullمن بطولة روبرت دي نيرو  و rocky  من بطولة سلفستر ستالون. فا انه المتفرج لو ما كان بتابع افلام كويس الفيلم مش راح يعني اله كتير لأنه اصلا الفيلم مبني على أداء روبرت دي نيرو و سلفتسر ستالون في الافلام الماضية الي لعبو فيها دور ملاكمين. والي بضحك في الموضوع انه الي كتب الفيلم حاول ما يخلي الفيلم عن هاد الموضوع لأنه ركز على القصة نفسها اكتر من المبارة. يعني و انت بتحضر الفيلم بتكون تستنى تعرف الماضي الي بينهم اكتر من المبارة نفسها عشان هيك الفيلم طلع مقبول حتى الحوار الي فيه مافي لحظات بتشدك غير مقطع واحد بس لما   روبرت دي نيرو يروح على بيت سليفتر ستالون عشان يقنعه انه يلعب المبارة الفاصله، بس يعني هاد المقطع الوحيد الي شدني.

الفيلم كوميدي بشكل بسيط يعني النكت الي فيه مش لا هناك و شفناها كتير قبل هيك.

الفيلم من بطولة روبرت دي نيرو و سلفستر ستالون و كيفين هارت و كيم باسنجر. أداء الفنانين كان رائع خصوصا كفين هارت بما هو اكتر واحد بضحك في الفيلم و هو الوحيد الي بشدك اله. يعني كيفين بتحسه بمسك المشهد بشكل مش طبيعي و سنة 2014 راح تكون سنته ( بنصح انك تشوف افلامه).

حبكة الفيلم غريبة شوي و مش مفهومه، يعني لما حضره راح تعرف انه في اشياء ما انذكرت او ما انشرحت في الفيلم. يعني كان عندهم فرصة لا اكتر من مشهد درامي بس ضيعوه على حالهم بالتجاهل يعني زي كأنهم بحكو للمتفرج انت غبي و مش راح تلاحظ الفراغات الكبيرة في الفيلم.

حبيت انهم عيبو على rocky 5  لما يكونو في محل اللحمه و يجي سلفتسر بده يضرب خروف ميت بروح مدربه بقله ( انت مجنون مش لازم تضرب كل اشي)

في رأي الي خرب الفيلم هو التالي: فليم مبني على اداء ممثلين في افلام سابقة و مع انهم حاولو ما يخلو الفيلم عن هاد الموضوع بطريقة انه التركيز كله على الماضي بين هدول الملاكمين بدل التركيز على المبارة بس ما نفعت هاي الحركة لانه الي متابع الفيلم و هو بعرف ماضي الممثلين كان مستني المبارة و الي متابع الفيلم و هو مش عارف ماضي الممثلين في افلام الملاكمة ما قدر يفهم شو يعني روبرت دي نيرو و سليفتسر ستالون في فليم ملاكمة مع بعض.

معلومات عن الفيلم. 

بقلم: نضال عطاونة

Nedal atawneh
توتر: @nedal_3750

Blog Twitter & Instagram: @KemzMovies 

نقد فيلم: حلل هذا (Analyze This)

ما بحب أكثر من روبرت دي نيرو في فليم بكون فيه زعيم عصابة مافيا. ما أتوقع أني لا حالي في الكون إلي بحب بشوف ممثل إمريكي من أصل إيطالي بلعب هاد الدور لمرحلة الكمال مافي حد بقدر ينكر روبرت دي نيرو كا ممثل بس لما يكون دور زعيم. عصابة. بلاتقيه بدخل في منطقة مافي حد غيره بقدر يدخلها أتوقع انه لو ما كان ممثل كان راح يكون زعيم مافيا. من الناحية التناية عنا بيلي كريستال في دور دكتور نفسي و زي روبروت بيلي لما يلعب دور الدكتور بلاقي منطقته و بقدر يجيب أبعاد للشخصية ما بنشوفها مع ممثل تاني. إذا في مقدمة من حلقة مسلسل فردينز قدر يمسك ألمشهد كله لحاله في مشهد مدته عشر دقايق و مين كان معاه؟ روبن ويلماز ملك الكوميديا.  

الفليم قصته عن زعيم مافيا بعاني من ضغط نفسي. فا بضطرر يروح يشوف دكتور نفسي عشان يساعده و الدكتور بلاقي حاله معلق بين الرفض و الموت أو الموافقة و الدخول في عالم العصابات. كلمة كوميديا بتحط حالها في النص بالغضب في هدا الفليم.

الحلو انه الفليم مش مبتذل و واقعي يعني تشكليهم لا عصابة مافيا واقعي من مساعدين لا عائلة و عائلة تانيه بتحاول تسطير على نيويورك و أداء روبرت دي نيرو في رجل عصابات أكثر من رائع من حركات الجسم لا أسلوب الكلام و بيلي كريستال أبدع لما لعب دور الدكتور النفسي آلي مطلق مرته و بحاول يتجوز مرة تانية و ابنه مبسوط أنه أبوه بعالج ( بول فيتي) عراب المافيا في نيويروك.

الكوميديا في الفليم أكترها موجودة في الحوار بين دكتور بحكي لغة علمية و مابعرف إشي عن عالم المافيا و بين زعيم عصابة مش متعود يسمع كلمة لاء ( إلا لو بده بقتل حد) بطلع بنظرة احتقار للدكتور أكبر همه كيف يعالج إنسان و ما بعرف شو يعني قتل. بس بنفس الوقت ما بقدر ينكر انه مجتاجه و انه شاطر في شغله و قدر يحلل شخصيته.

مشهد الانتحار في العرس حلو كتير الأحلى منه ردة الفعل لا بيلي كريستال و روبرت دي نيرو لما يجاول يعلمه كيف ينفس عن غضبه بأسلوب حضاري ما بتضمن مسدسات زي ما أتعودنا. من أفلام المافيا و آخر مشهد في الفليم لما الدكتور يضطر يروح على اجتماع زعماء مافيا هو أصلا مش عارف شو بده يصير هناك و ببدا يألف و يستخدم قدرته على الكلام كا دكتور نفسي في التعامل مع ناس عايشين ع قانون الغابة.

الفليم عجبني كتير لدرجة أني شفته في السينما لما نزل و شرتيه دي في دي و لما ينعرض ع التلفزيون بفضي حالي عشان أحضره لأنه الفليم كامل مكمل من حبكة قصة لا أداء ممثلين و حوار بينهم أكثر من ممتع.

لو ما شفت الفليم قبل هيك أتفرج عليه. مش راح تندم و 100في ال 100 راح تضحك.

بقلم: نضال العطاونة
Nedal Atawneh

توتر: @nedal_3750

توتر الموقع: @KemzMovies